RCP na escola

Xa estamos aquí de novo! Esta vez coa iniciativa que se puido desenvolver a pasada semana:
Nocións básicas de primeiros auxilios orientados ao coñecemento e práctica do RCP.

Parece claro que é necesario contar cunha formación básica que permita facer un recoñecemento precoz das situacións de emerxencias mais comúns e como pedir axuda para gañar tempo.

Así, durante uns días, puidemos comprobar como o RCP (reanimación cardio pulmonar) require de moita enerxía, práctica e uns maniquís Laerdal dispostos a non protestar moito co ritmo da canción de "Bob Esponja".
Deixamos algunhas fotos das prácticas. E hoxe contaremos cunha vistia ao centro dunha ambulacia do 061. Saúdos!

Cal é o voso deporte favorito?

Boas! Que ultimamente as entradas do blog veñen sempre da mesma persoa e a idea deste espazo é contar con mais colaboradores e colaboradoras.

Así que antes de que veña a Semana Santa gustaríanos saber cales son as vosas diversións: Qué xogos e deportes practicades e por qué vos gusta tanto. Podedes poñer fotos, textos, enlaces a webs... ou mesmo un vídeo explicándoo.

Animádevos!

Probamos a xogar ao tenis!

O mércores tocou... Tenis!

Esta semana tivemos a oportunidade de participar nunhas xornadas de promoción do tenis, nas instalacións do Club de Tenis Pontevedra.
Pista cuberta de terra batida... moito espazo para xogar... e profesorado da Federación Galega. O marco ideal para probar un deporte onde sempre hai diversión asegurada.

Fotos no enlace!
https://photos.app.goo.gl/ODsa2sB6UCewXOun1
E se hai algunha que considerades que non debería de estar subida, avisade e se retirará ao momento. Esperamos que vos gusten!

1ª Xornada de Fútsal

Moi boas! Por fin puidemos levar a cabo a nosa actividade de fútbol sala para o alumnado de 3º e 4º: O fútsal!

Coas instalacións do Pavillón do Príncipe Felipe como lugar perfecto para correr e xogar, o pasado mércores comezamos unha serie de encontros deportivos cos nenos e nenas doutros centros.
Unha magnífica oportunidade para promover actividade física saúdable dentro do contexto educativo.

Aquí vos quedan unhas fotos. Esperamos que vos gusten!

https://photos.app.goo.gl/WKAL8VPrf0zgdDOg1

As fotos do bádminton!

Aquí estamos novamente, con mais fotos do deporte escolar! Esta vez do encontro entre centros escolares que se disputou o pasado 10 de febreiro na Estrada.

A idea era probar en que consisten as competicións de bádminton, dentro do programa da propia Federación. Pero non podemos esquecer que a nosa finalidade era a de compartir momentos de ocio saudable cos compañeiros e compañeiras da escola; obxectivo cumprido!

Moitas grazas á colaboración do CB Pontevedra e ás familias, que organizaron o desprazamento e que fixeron posible esta xornada.

Esperamos que vos gusten as fotos. Saúdos!!

https://photos.app.goo.gl/NrROuWpKjeuXUM043

Xoga-loita!

Boas, xa estamos de novo co blog. Desta vez co alumnado de 4º, que puideron participar nunha actividade ben diferente: o "Xoga-loita"

Así, o pasado xoves, tivemos a oportunidade de visitar as instalacións do Centro galego de tecnificación deportiva e probar o tapiz que usan habitualmente os deportistas da Selección galega de loita.

Foron xogos de oposición con agarre, como "quitarlle a cola ao cabalo", "darlle a volta á tortilla" ou o "soga-tira" de sempre. Ademais, foi unha oportunidade para xogar con nenos e nenas doutros centros dentro dunha xornada de actividade deportiva e saudable.

No enlace vos queda algunha foto do encontro; esperamos que vos gusten e, coma sempre, se considerades que algunha das imaxes non debería de estar publicada avisade que rapidamente se retirará. 

https://photos.app.goo.gl/tevhBdQNVIBk54Of2

Deica!

Xornada de competición interescolar!

Moi boas!
Mañá, en plena festa do Entroido, un grupo de alumnos e alumnas de 5º de primaria vanse desprazar ata A Estrada, para competir competir en bádminton escolar, dentro da modalidade da Federación Española "Bádminton Plus".

A idea é probar como se xoga nun contexto de competición, cun pavillón axeitado e con nenos e nenas doutros centros.
Confiamos en que teñades unha magnífica xornada e que o pasedes moi ben. Á volta do Entroido, queremos ver esas fotos!

Un saúdo e moita sorte!